चितवन : चितवन जिल्लाका विभिन्न स्थानमा सञ्चालन हुँदै आएका स्पा सेन्टरहरूमा प्रहरीले विशेष अप्रेसन सञ्चालन गर्दै आकस्मिक छापा मारेको छ। जिल्ला प्रहरी कार्यालय चितवनको नेतृत्वमा खटिएको टोलीले बुधबार गरेको उक्त कारबाहीका क्रममा करिब ८ जना व्यक्तिलाई नियन्त्रणमा लिएको छ।
प्रहरीका अनुसार नियन्त्रणमा पर्नेहरूमा स्पा सञ्चालक तथा त्यहाँ कार्यरत कर्मचारीहरू रहेका छन्। प्रारम्भिक अनुसन्धानबाट अधिकांश स्पा सेन्टरहरू कानुनी प्रक्रिया पूरा नगरी बिना दर्ता सञ्चालनमा रहेको पाइएको छ भने केही स्थानमा गैरकानुनी तथा शंकास्पद गतिविधि समेत भइरहेको खुलेको जनाइएको छ।
प्रहरीले पछिल्लो समय यस्ता अवैध क्रियाकलाप बढ्दै गएको गुनासो आएपछि निगरानीलाई तीव्र बनाउँदै आएको थियो। सोही क्रममा लामो समयदेखि गोप्य रूपमा अनुसन्धान गर्दै आएको प्रहरी टोलीले आज विशेष योजनासहित छापा हानेको हो।
जिल्ला प्रहरी कार्यालय चितवनका प्रवक्ता रबिन्द्र खनालका अनुसार यस्ता गतिविधिलाई नियन्त्रणमा लिन प्रहरीले अभियानकै रूपमा अनुगमन र कारबाहीलाई निरन्तरता दिने तयारी गरेको छ। “कानुनविपरीत सञ्चालन हुने कुनै पनि व्यवसायलाई छुट दिइने छैन,” उहाँले भन्नुभयो।
नियन्त्रणमा लिइएकाहरूलाई आवश्यक अनुसन्धानका लागि हिरासतमा राखिएको छ भने सम्बन्धित निकायहरूसँग समन्वय गरी थप कानुनी प्रक्रिया अघि बढाइने प्रहरीले जनाएको छ। प्रहरीको यस कदमलाई स्थानीयवासीले सकारात्मक रूपमा लिँदै यस्ता गतिविधि नियन्त्रणमा निरन्तरता दिनुपर्ने माग गरेका छन्।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
