तमिलनाडु : तमिलनाडुमा नयाँ सरकार गठनको विषयलाई लिएर राजनीतिक अन्योल कायमै रहेका बेला भीसीके पार्टीले आज टीभीके प्रमुख जोसेफ विजयलाई समर्थन दिने वा नदिने भन्नेबारे अन्तिम निर्णय लिँदैछ।

भीसीके प्रमुख थोल थिरुमावलवनले आफ्नो पार्टीको निर्णय वामपन्थी दलहरूको निर्णयसँगै हुने बताइसकेका छन् भने वामपन्थी दलहरूले विजयलाई यसअघि नै समर्थन दिने घोषणा गरिसकेका छन्। २३४ सदस्यीय तमिलनाडु विधानसभामा बहुमतका लागि ११८ विधायक आवश्यक पर्नेमा विजयको पार्टी टीभीकेसँग १०८ विधायक छन्। उनलाई बहुमत पुर्‍याउन थप दुई विधायकको आवश्यकता रहेकाले भीसीकेको समर्थन निर्णायक बनेको हो।

विजयलाई हालसम्म कांग्रेसका ५, सिपिआईका २ र सिपिएमका २ विधायकको समर्थन प्राप्त भइसकेको छ। यद्यपि, कांग्रेस र वामपन्थी दलहरूले भाजपाको कुनै पनि सहयोगी दल गठबन्धनमा सामेल हुन नपाउने सर्त राखेका छन्। यस सर्तका कारण पीएमकेका चार विधायकहरू विजयको गठबन्धनमा सामेल हुने सम्भावना समाप्त भएको छ। विजयले शुक्रबार साँझ राज्यपाल राजेन्द्र अर्लेकरलाई भेटेर ११६ विधायकको समर्थन पत्र बुझाएका थिए, जुन बहुमतभन्दा दुई सिट कम हो।

यसैबिच, भीसीकेले समर्थनका लागि कडा सर्तहरू अघि सारेको छ। भीसीकेका सांसद एवं महासचिव डी रविकुमारले बीबीसी हिन्दीसँग कुरा गर्दै पार्टीका पदाधिकारीहरूले आफ्नो नेतालाई उपमुख्यमन्त्रीको पद दिनुपर्ने सुझाव दिएको बताएका छन्।

उनले भनेका छन्, ‘हामी वाम दलहरूजस्तै बाहिरबाट मात्र समर्थन दिन चाहँदैनौँ। कुनै जिम्मेवारीविनाको समर्थन मात्र दिने तरिका असफल हुन्छ।’ उपमुख्यमन्त्री पदका अतिरिक्त भीसीकेले चिदम्बरम लोकसभा सिट र विजयले छोड्न सक्ने तिरुची ईस्ट विधानसभा सिटमा समेत दाबी गरेको छ। विजय दुई क्षेत्रबाट निर्वाचित भएकाले उनले तिरुची ईस्ट सिट छोड्ने सम्भावना छ।

रविकुमारले आफूहरू हतारमा निर्णय लिने पक्षमा नरहेको र आज दिउँसो २ बजेसम्मको समय बाँकी रहेको स्पष्ट पारेका छन्। यदि भीसीकेले समर्थन पत्र बुझाएमा राज्यपालले निश्चित रूपमा शपथ ग्रहणका लागि बोलाउने उनको विश्वास छ। वर्तमान विधानसभाको कार्यकाल भोलि सकिने भएकाले दलहरूले आजै निर्णय लिनु पर्ने दबाब छ। यदि विजयले आज भीसीकेका मागहरू सम्बोधन गर्न सकेनन् भने राज्यपालले भोलि औपचारिक रूपमा विधानसभाको कार्यकाल अन्त्य गर्ने वा राज्यमा राष्ट्रपति शासन लागू गर्न सिफारिस गर्ने सम्भावना रहेको छ।